Bu ilin dekabr ayında Şuşa şəhər 1 nömrəli orta məktəbinin 180 illik yubileyi qeyd ediləcək. Yubiley ərəfəsində bu məktəbin məzunu, sonralar isə müəllimi, hazırda rayon təhsil şöbəsinin aparıcı məsləhətçisi, şair-publisist Əyyub Şırlanlının “Şuşa Zaqafqaziyada müstəsna əhəmiyyət kəsb edən təhsil mərkəzi və ziyalılar şəhəridir” kitabı çapdan çıxıb.

Kitabda Şuşa qəza məktəbinin keçdiyi tarixi yola nəzər salınır, qəza məktəbindən sonrakı məktəblərə, xüsusilə 180 yaşı özündə daşıyan şəhər 1 nömrəli orta məktəbinə diqqət yetirilir, onun yetirmələri xatırladılır, tanınmış müəllimləri və məzunlarının uğurlarından söz açılır, Azərbaycan pedaqoji fikrinin inkişafında Şuşa ziyalılarının rolu vurğulanır.

Nəşrdə Şuşanın tarixi, mədəniyyəti, memarlıq və incəsənət abidələri haqqında da məlumat var.

Kitabın redaktoru Azərbaycan Təhsil Problemləri İnstitutunun elmi katibi, Rusiya Pedaqoji və Sosial Elmlər Akademiyasının həqiqi üzvü, pedaqoji elmlər doktoru, professor Akif Abbasovdur.