Milli Teleradio Şurasının (MTRŞ) iulun 30-da keçirilən iclasında teleradio yayımı sahəsindəki mövcud vəziyyət müzakirə edilib. Şuradan “Turan” informasiya agentliyinə daxil olan məlumatda deyilir ki, müzakirədə teleradio verilişlərinin daha çox şou-biznes xarakterli olması, telekanalların ucuz reytinqə üstünlük verməsi, maarifçilik xarakterli verilişlərin azlığı ilə bağlı narazılıq ifadə olunub.

MTRŞ hesab edir ki, Azərbaycan mədəniyyətinin, coğrafiyasının, milli-mənəvi dəyərlərin təbliği ilə bağlı mədəniyyət televiziya kanalının açılması zəruridir. Buna görə də MTRŞ Azərbaycanda ixtisaslaşdırılmış televiziya kanalının - mədəniyyət telekanalının açılması ilə bağlı Bakı və Abşeron ərazisində 44-cü tezlik resursuna müsabiqə elan edib. Müsabiqəyə ərizə qəbulu avqustun 4-dən sentyabrın 15-dək aparılacaq. ANSPRESS