Müsabiqənin təşkilat komitəsindən APA-ya verilən məlumata görə, hər il keçirilən Nəsimi Milli Ədəbiyyat Müsabiqəsi (MƏM) yeni istedadların üzə çıxarılması və təbliği məqsədi ilə keçirilən müsabiqənin qaydalarında bu ildən etibarən yeniliklər edilib.

Əlavələrə görə, yeni istedadlarla yanaşı, ilin ədəbi yekunları da dəyərləndiriləcək. İki mərhələdə keçiriləcək müsabiqədə ilkin olaraq “İlin romanı” və “İlin şeir kitabı” seçiləcək. Müsabiqənin bu mərhələsinə müəlliflərdən əsərlər qəbul olunmayacaq. Qaliblər Ekspertlər Şurasının hər bir üzvünün ümumi dəyərləndirməyə təqdim edəcəyi əsərlər arasından seçiləcək. İlin ədəbi yekunlarından əlavə, baş mükafat olaraq son 10 ilin uğurlu ədəbi əsəri də elan olunacaq.

Müsabiqənin ikinci mərhələsi isə ənənəvi olaraq yeni istedadların üzə çıxarılması məqsədi daşıyacaq. Gənc müəlliflər heç bir yerdə dərc olunmayan 3 şeir və ya hekayə ilə bu nominasiyaya qatıla bilərlər.

I mərhələnin qalibləri 25 dekabr 2010-cu ildə, ikinci mərhələnin qalibləri isə 2011-ci ildə 2 fevral Gənclər Günündə elan olunacaq.

Qeyd edək ki, müsabiqənin təşkilatçısı www.kultaz.com mədəniyyət portalıdır. Müsabiqə 2008-ci ildən keçirilir. APA