Mikayıl Müşfiq 1908-ci il iyunun 5-də Bakı şəhərində, ziyalı ailəsində anadan olub. O, əslən Xızı rayonundan olub milliyətcə tatdır. İbtidai təhsilini inqilabdan əvvəl rus-tatar məktəbində alıb. Azərbaycanda Sovet hakimiyyəti qurulduqdan sonra Bakı Darül-müəllimində və 12 saylı II dərəcəli məktəbdə oxuyub. Azərbaycan Dövlət Darülfünunun dil və adəbiyyat fakültəsini bitirib. (1927-1931).

Əmək fəaliyyətinə pedaqoq kimi başlayıb və Bakı orta məktəblərində yeddi il müəllimlik edib. Son iş yeri isə 18 saylı Bakı şəhər orta məktəbi olub (bu məktəb indi onun adını daşıyır). Poetik yaradıcılığa 1926-cı ildə «Gənc işçi» qəzetində çap etdirdiyi «Bir gün» şeirilə başlayıb. Bundan sonra dövri mətbuatda müntəzəm çıxış edib. O, bədii tərcümə ilə də ciddi məşğul olub.

1930-50-ci illərdə ölkəni bürüyən repressiyalar zamanı təqib və böhtanlara məruz qalaraq, gənc yaşında həbs edilib. Bir çox ziyalılarımız kimi «xalq düşməni» damğası ilə 1938-ci il yanvarın 6-da güllələnib.

Əbədiləşdirmək üçün Bakıda büstü qoyulub, məktəbə, küçəyə və qəsəbəyə adı verilib. ANSPRESS