Bu gün Beynəlxalq Muğam Mərkəzində Gənclər və İdman Nazirliyi və Gənclər Təşkilatları Milli Şurasının (GTMŞ) təşkilatçılığı ilə “Fəxri gənc” mükafatının təntənəli təqdimat mərasimi olub. “Fəxri gənc” mükafatı “Gəncləri ən çox dəstəkləyən yerli qeyri-hökumət qurumu” nominasiyası üzrə Heydər Əliyev Fonduna, “Gəncləri ən çox dəstəkləyən dövlət qurumunun başçısı” nominasiyası üzrə isə nazir Azad Rəhimova təqdim edilib. Heydər Əliyev Fondunun Rusiya nümayəndəliyinin rəhbəri, Rusiyanın Azərbaycanlı Gənclər Təşkilatının sədri Leyla Əliyeva isə “Gənclərin beynəlxalq əlaqələrinin inkişafına və mədəniyyətlərarası dialoqa töhfəyə görə” mükafatına layiq görülüb.

“Gənclərin təşkilatlanmasında xidmətlərə görə” nominasiyası üzrə mükafat Milli Məclisin deputatı Əkrəm Abdullayevə, “Gənclərin hərbi vətənpərvərlik ruhunda tərbiyəsindəki xidmətlərə görə” isə Könüllü Hərbi Vətənpərvərlik Texniki İdman Cəmiyyəti Respublika Şurasının sədri, polkovnik Novruzəli Orucova təqdim olunub.

“Eurovision-2009” mahnı müsabiqəsində üçüncü yerin sahibi Aysel Teymurzadə və “Bu şəhərdə” prodakşının baş direktoru Müşfiq Abbasov “Mədəniyyət və incəsənət sahəsində nailiyyətlərinə görə” nominasiyasında mükafatlara sahib olub. ANSPRESS