Görkəmli Azərbaycan müğənnisi, SSRİ-nin və Azərbaycanın xalq artisti Müslüm Maqomayevin doğum günü – avqustun 17-də “Radio Alla”nın efiri bu dahi insanın həyat və yaradıcılığına həsr olunacaq. Sovet estrada ulduzlarından Müslüm Maqomayevlə rəqabət aparanı az tapılardı. Onun təkrarolunmaz bariton səsi, yüksək artistlik qabiliyyəti, zəngin mənəviyyatı insanların ürəklərini fəth edirdi. Müslüm Maqomayev indi aramızda olmasa da, hələ də milyonların kumiridir.

Avqustun 17-i “Radio Alla”nın efirində bütün günü Müslüm Maqomayevin mahnıları səslənəcək, dinləyicilərə “Sənə minnətdaram” adlı veriliş təqdim olunacaq. Dahi müğənninin yaxın dostları və pərəstişkarları onunla bağlı xatirələrini bölüşəcəklər.

Bundan əlavə, “Radio Alla”nın saytında müğənninin həyat və yaradıcılığından bəhs edən xüsusi səhifə açılacaqdır. Səhifədə hər kəs Müslüm Maqomayevin təkrarsız sənətinə vurğunluğunu ifadə edə bilər.
Təfsilatları “Radio Alla”nın efirindən və www.radioalla.ru saytından öyrənmək olar.ANSPRESS