Vəkillər Kollegiyası Rəyasət Heyəti vəkil Aslan İsmayılovla bağlı məlumat yayıb. ANS PRESS-in verdiyi xəbərə görə, yayılan məlumatda ölkədə fəaliyyət göstərən bir sıra KİV-lərdə Vəkillər Kollegiyasının Rəyasət Heyəti tərəfindən vəkil Aslan İsmayılovun Kollegiya üzvlüyündən xaric edilməsi ilə bağlı qərar çıxarılması haqqında yanlış və təhrif olunmuş məlumatların gəzdiyi deyilir.

Məsələ ilə əlaqədar, Vəkillər Kollegiyasının Rəyasət Heyəti bildirir ki, “Vəkillər və vəkillik fəaliyyəti haqqında” Azərbaycan Respublikasının Qanununa əsasən, Rəyasət Heyətinin intizam qaydasında heç bir vəkili Kollegiya üzvlüyündən xaric etmək kimi səlahiyyəti yoxdur və qanunvericilikdə bu səlahiyyət yalnız müvafiq məhkəmələrə aiddir.

Beləliklə, mətbuatda dolaşan qeyri-müəyyənliyə aydınlıq gətirilməsi məqsədi ilə Vəkillər Kollegiyasının Rəyasət Heyəti bildirir ki, cari ilin may ayının 8-də Vəkillərin İntizam Komissiyasının rəyinə əsasən, Vəkillər Kollegiyasının Rəyasət Heyəti vəkil Aslan İsmayılovun Kollegiya üzvlüyündən xaric edilməsi ilə bağlı məhkəməyə müraciət edilməsi haqqında qərar qəbul etmişdir.

Belə ki, 14 fevral 2013-cü il tarixdə Bakı şəhəri Səbail Rayon Məhkəməsinin hakimi Elnur Həsənov vəkil Aslan İsmayılovun qanunsuz hərəkətləri barədə Vəkillər Kollegiyasının Rəyasət Heyətinə məktubla müraciət etmişdir. Müraciət araşdırılması üçün Vəkillərin İntizam Komissiyasına göndərilmişdir. Vəkillərin İntizam Komissiyasının rəyinə əsasən, A.İsmayılov peşə fəaliyyətini həyata keçirərkən "Vəkillər və vəkillik fəaliyyəti haqqında" və "Məhkəmələr və hakimlər haqqında" Azərbaycan Respublikası qanunlarının tələblərini kobud surətdə pozmuşdur. Vəkillərin İntizam Komissiyasının rəyi A.İsmayılova təqdim edilib.

Məsələyə məhkəmə qaydasında hüquqi müstəvidə münasibət bildiriləcəkdir.