Azərbaycanda yeni doğulan uşaqlara verilmək üçün istifadəsi məqbul hesab ediləcək adların yeni siyahısına görə gələn həftə AMEA-da iclas keçiriləcək. ANS PRESS-in məlumatına görə, bu barədə Modern.az saytına Azərbaycan Milli Elmlər Akademiyası (AMEA) Terminologiya Komissiyasının sədr müavini Sayalı Sadıqova məlumat verib. Onun sözlərinə görə, bir ilə yaxındır ki, üzərində iş gedən istifadəsi məqbul hesab ediləcək adların siyahısı hələ ki, tam başa çatmayıb.

“Komissiyada sədr olmadığından məsələ dayanmışdı. Amma Akademiya prezidenti Akif Əlizadə iyul ayında komissiyaya sədr seçilib. Sentyabrın 18-də bu məsələni müzakirə etmişik. Gələn həftə komissiyanın üzvlərinin iclası keçiriləcək. Siyahımız müəyyənləşib. Həmin siyahı mərhum Mahmud Kərimova aydın idi. Amma Akif Əlizadəyə aydın deyildi. Odur ki, siyahı hələ müzakirə edilir”.

Rayonlarda VVADQ idarələrinin yeni doğulan uşaqlara istənilən adların qoyulmasına göz yumduğunu deyən Sayalı Sadıqova bildirib ki, Terminologiya Komissiyasının hazırladığı siyahıya gülüş doğuran bəzi adlar salınmayıb.

“Adlarla bağlı siyahı Ədliyyə Nazirliyindən alınıb. İndi o siyahı müzakirə olunacaq. Hansı adlar ki, müasir dövrə uyğun deyil, gülüş doğurur, onlar siyahıdan çıxarılıb. İnanmıram ki, indi hansısa valideyn övladına “Traktor”, “Limonad”, “Şüyüd” adını qoysun. Bu tipli adlar bizim siyahımızda yoxdur. Komissiyaya 20 min addan ibarət siyahı təqdim edilmişdi. Amma orada təkrar adlar çox olduğundan, onlar ixtisara salındı və nəticədə 9 minə qədər ad qaldı. 2 minə yaxın gülüş doğuran adı siyahıdan çıxartdıq. İndi yekun siyahı gələn həftə Komissiyanın iclasında müzakirə olunacaq”.