Prezident İlham Əliyev oktyabrın 19-da səhiyyə sahəsində idarəetməyə dair fərman və sərəncamlar imzalayıb: “Tibbi Ərazi Bölmələrini İdarəetmə Birliyi” (TƏBİB) Səhiyyə Nazirliyinin tabeliyinə verilib, Teymur Musayev səhiyyə naziri vəzifəsindən azad edilərək Baş nazirin müavini, Anar Bayramov isə yeni səhiyyə naziri təyin olunub.
TƏBİB nazirliyin tabeliyinə keçir
“Səhiyyə sahəsində idarəetmənin təkmilləşdirilməsi ilə bağlı bir sıra tədbirlər haqqında” Fərmana əsasən, TƏBİB publik hüquqi şəxsinin hüquq və öhdəlikləri, habelə əmlakı Nazirliyin tabeliyində fəaliyyət göstərəcək eyni adlı publik hüquqi şəxsə keçir. Yeni TƏBİB-in nizamnamə fondu mövcud qurumun əmlakı hesabına formalaşacaq.
Fərmanda göstərilir ki, yeni qurum dövlət qeydiyyatına alınanadək mövcud publik hüquqi şəxs fəaliyyətini davam etdirir, onun Müşahidə Şurasının səlahiyyətlərini isə Nazirliyin yaratdığı komissiya həyata keçirir. TƏBİB-in fəaliyyətinə cari rəhbərliyi Nazirlik tərəfindən vəzifəyə təyin və vəzifədən azad edilən sədr və onun dörd müavinindən ibarət İdarə Heyəti həyata keçirəcək.
Təsisçi səlahiyyətləri də bölüşdürülüb. Nizamnamənin təsdiqi, nizamnamə fondunun miqdarının müəyyənləşdirilməsi, idarəetmə orqanlarının yaradılması, qurumun yenidən təşkili və ləğvi Prezidentin səlahiyyətində saxlanılıb. Təsisçiyə aid digər məsələlərin həlli Səhiyyə Nazirliyinə həvalə olunub.
Nazirlər Kabineti üç ay müddətində normativ hüquqi aktların təkmilləşdirilməsi, eləcə də Nazirliyin təklifləri əsasında TƏBİB-in nizamnamə layihəsi və nizamnamə fondunun miqdarı ilə bağlı təkliflərini Prezidentə təqdim etməlidir. Nizamnamə təsdiqləndikdən sonra üç gün ərzində qeydiyyat üçün tədbirlər görülməli, qurum qeydiyyata alındıqdan sonra bir ay ərzində isə əmlak TƏBİB-in balansına verilməlidir.
Teymur Musayev Baş nazirin müavini oldu
Ayrı sərəncamlarla Teymur Musayev səhiyyə naziri vəzifəsindən azad edilib və Baş nazirin müavini təyin olunub. Bununla da Baş nazirin müavinlərinin sayı dördə çatıb. Baş nazirin birinci müavini Yaqub Eyyubovdur, müavinlər sırasında Şahin Mustafayev və Samir Şərifovla yanaşı, indi Teymur Musayev də yer alır.
1970-ci ildə Bakıda anadan olan Teymur Musayev ixtisasca həkim-uroloqdur və tibb elmləri namizədidir. O, uzun illər özəl klinikalarda həkim və rəhbər vəzifələrdə çalışıb, 2020-ci ilin aprelindən Səhiyyə Nazirliyinin Səhiyyənin təşkili şöbəsinə rəhbərlik edib. 2021-ci ilin aprelində səhiyyə nazirinin birinci müavini, 2022-ci ilin 19 yanvarında isə səhiyyə naziri təyin olunmuşdu.
Yeni nazir kimdir
Səhiyyə naziri təyin olunan Anar Məhərrəm oğlu Bayramov 1975-ci ildə anadan olub. O, Azərbaycan Tibb Universitetini qırmızı diplomla bitirib, təhsil illərində Akademik Mirqasımov adına təqaüdə layiq görülüb. Azərbaycan Dövlət İqtisad Universitetində iqtisadiyyat və idarəetmə ixtisası üzrə magistr təhsili alıb, 2003-cü ildən tibb üzrə fəlsəfə doktorudur.
Bayramov 1998-ci ildən “MediClub” klinikasında həkim işləyib, 2002-ci ildən “A-Group” Sığorta Şirkətində müxtəlif vəzifələrdə çalışaraq şirkətin İdarə Heyətinin sədri olub. 2006–2014-cü illərdə Azərbaycan Sığortaçılar Assosiasiyasının Tibbi Sığorta Komitəsinə sədrlik edib. 2021-ci ildən əmək və əhalinin sosial müdafiəsi nazirinin müşaviri işləyib, Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri olub. 2025-ci ilin 17 aprelində əmək və əhalinin sosial müdafiəsi nazirinin müavini təyin edilib.
Nazir təyinatından əvvəl Anar Bayramov TƏBİB-in icraçı direktoru vəzifəsində çalışırdı. O, oktyabrın 18-də bu vəzifədə Quba Rayon Mərkəzi Xəstəxanasının fəaliyyəti ilə tanış olub, xəstəxana rəhbərliyinə pasiyentyönümlü yanaşmanın gücləndirilməsi və rəqəmsal həllərin genişləndirilməsi ilə bağlı tapşırıqlar verib. Oktyabrın 19-da yayılan məlumata görə, onun əmri ilə Rafiq Nağıyev Abşeron Rayon Mərkəzi Xəstəxanasının baş həkimi təyin olunub.
Keçid dövründə nə dəyişir
Fərmana görə, yeni TƏBİB qeydiyyata alınanadək mövcud qurum fəaliyyətini davam etdirir. Rəsmi sənədlərdə dövlət tibb müəssisələrində pasiyentlərə xidmət qaydasının dəyişməsi barədə hələlik məlumat yoxdur. TƏBİB-in yeni nizamnaməsi, nizamnamə fondu və rəhbərliyinin tərkibi Nazirlər Kabinetinin və Səhiyyə Nazirliyinin təklifləri əsasında müəyyənləşəcək.
Şərhlər