Şəki Regional Debat Mərkəzinin təşkilatçılığı ilə Şəki Şəhər Qarışıq tipli İnternat Məktəbində Ramazan bayramı ilə əlaqədar olaraq kimsəsiz uşaqlar üçün bayram tədbiri keçirilib. Tədbirin keçirilməsi üçün 1 ay əvvəldən sosial media və şəbəkələr vasitəsilə insanlara xeyriyyə aksiyası barədə məlumat verilib və 1 ay ərzində uşaqları bayram günü sevindirmək üçün onlara tədbir proqramı hazırlanıb.

Tədbir rəsmi və qeyri rəsmi hissədən ibarət oldu. Rəsmi hissədə gənclərin artıq 3 ildir bu cür tədbirlərini maraqla qarşılayan uşaqları Şəki Regional Debat Mərkəzinin rəhbəri Dəyanət Elmansoy təbrik etdi.

Daha sonra tədbirin əyləncəli hissəsi başlayıb. Bu hissədə uşaqlar müxtəlif rəqslər, oyunlar oynayıb və hədiyyələr qazanıblar. Onlar üçün body art (bədən üzərində rəsmlər) də gənc rəssamlar tərəfindən həyata keçirildi.

Tədbirdə müxtəlif yaş qruplarından olan uşaqlar olduğu üçün hər bir uşağa mikrofondan çıxış etmək imkanı yaradıldı ki, bu da onlara bayram günü xüsusi sevinc yaşatdı. Uşaqlar həmçinin mərkəzin aldığı şirniyyat və çərəzlərə də qonaq oldular. Tədbir boyu gözləri daim yollarda qalan bu kimsəsiz uşaqlar gənclərlə birlikdə bolluca əyləndilər, oynadılar.

Sonda bütün uşaqlar birlikdə bayram tortunu kəsdilər.

Qeyd edək ki, tədbirin keçirilməsində ayrı-ayrı şirkətlər və fərdi şəxslər öz yardımlarını əsirgəməyiblər.