“Qış bulvarı”na daxil olanda, ilk diqqətimizi çəkən işləməyən fontanlar oldu. Uzun zaman təmir işləri gedən parkda hələ də işlərin yekunlaşmaması əraziyə dincəlməyə gəlib-gedənlərin sayını azaltsa da, sərinlənmək ümidi ilə parka üz tutanlar az deyildi.

“Qış bulvarı" kimi tanıdığımız park Heydər Əliyev Sarayının arxasından başlayaraq Füzuli meydanına qədər olan ərazidə salınıb. İşıqlandırma, dekorativ ağac və gülləriylə göz oxşayan park həm də təmizliyi və sakitliyi ilə diqqəti cəlb edir.

2009-cu ildən prezident İlham Əliyevin tapşırığına əsasən inşa olunan park kompleksi 4 min 500 avtomobil tutumuna malik yeraltı dayanacağın üzərində tikilib. Yeraltı dayanacağa daxil olan sürücü elektron tablolar vasitəsilə boş yerlər haqqında məlumat ala bilir.

Paytaxt ərazisində salınan ən böyük park olan bu yeni kompleks həm də yaşlı insanlar və təqaüdçülər üçün əlverişlidir. 7 hektar ərazisi olan parkın 35 min kvadratmetrlik ərazisi yaşıllaşdırılıb.

Komplekdə həmçinin müasir tələblərə cavab verən 5 fəvvarə inşa olunub.