Bakı Metropoliteni sərnişinlərin problemini həll etmək əvəzinə daha çox öz işçilərinin qeydinə qalır. Milli.Az-ın məlumatına görə, metrodan istifadə edən sərnişinlərin kondisioner arzusu reallaşmasa da, işçiləri üçün bütün şərait yaradılır.

Metronun “Koroğlu” stansiyasında metropoliten işçilərinin xidməti otağında quraşdırılan kondisionerin motoru bayıra qoyulub. Motorun istisi stansiyaya ötürülür.

Beləliklə, Metropoliten sərnişinlər üçün sərinlik yaratmaq bir yana, əkslinə öz istilərini onlara verirlər.

Məsələ ilə bağlı Bakı metropolitenin mətbuat xidmətinin rəhbəri Nəzakət Tanrıverdiyeva Milli.Az-a açıqlamasında stansiyanın rəhbərliyi ilə danışmağı məsləhət gördü.

Stansiyadan Milli.Az-a bildirildi ki, metro işçiləri bütün sutka ərzində xidmət aparır və buna görə onları anlamaq lazımdır. Havasızlıqda xidmət aparmaq mümkün olmadığından xidməti otaqda kondisioner qoyulub.

Qeyd edildi ki, həmin kondisionerlərin havasını başqa cür çıxarmaq mümkün deyil. Ancaq həmin kondisionerlər bütün gün ərzində yox, istirahət və nahar vaxtları işə salınır.