“Bulla-dəniz” yatağında qəza baş vermiş 90 saylı quyunun yanmış qazma avadanlıqlarından təmizlənməsi işləri davam etdirilir.

ANS PRESS-in ARDNŞ-in rəsmi saytına istinadən verdiyi məlumata görə, “Bulla-dəniz” yatağındakı 90 saylı quyuda qazma zamanı baş vermiş qəzanın aradan qaldırılması məqsədi ilə aparılan işlər avqustun 29-da davam etdirilib.

Görülmüş işlər nəticəsində quyudakı qazma avadanlığının ümumilikdə 35-40%-ə qədəri demontaj olunaraq, özüldən gəmilərə yüklənmiş və sahilə çıxarılmışdır.

Qəzanın aradan qaldırılması istiqamətində ARDNŞ və Fövqəladə Hallar Nazirliyinin mütəxəssisləri tərəfindən görülən tədbirlər nəzərdə tutulmuş iş planına uyğun olaraq davam etdirilir.