Azərbaycan Milli QHT Forumu oktyabrın 11-də məktəblərdə şagird və müəllimlərin geyim qaydaları ətrafında aparılan müzakirələrlə bağlı bəyanat yayıb. Yüzlərlə qeyri-hökumət təşkilatını birləşdirən çətir qurum bu mövzunun məqsədyönlü şəkildə siyasiləşdirilməsini və dini qarşıdurma müstəvisinə keçirilməsinə təhrikləri qətiyyətlə pislədiyini bildirib.
Bəyanatda nə deyilir
Forum son günlər İran və digər xarici ölkələrin internet resurslarında Azərbaycanın dünyəvi dövlətçilik modelini hədəfə alan və ölkədə şəriət prinsiplərinə əsaslanan dövlət quruluşunu təşviq edən informasiya hücumlarının müşahidə olunduğunu iddia edir. Qurumun fikrincə, bu kampaniyalar ictimai rəyi çaşdırmağa və cəmiyyətdə süni qarşıdurma yaratmağa yönəlib.
Bəyanatda dünyəvilik Azərbaycanın tarixi nailiyyəti, dövlətçilik ənənəsi və milli sərvəti kimi səciyyələndirilir. Sənəddə Azərbaycanın müsəlman Şərqində və türk dünyasında dünyəvi dövlətçilik ənənəsini formalaşdıran ilk ölkə olduğu xatırladılır, eyni zamanda xalqın dini-mənəvi dəyərlərə ehtiramı, məscid, kilsə və sinaqoqların yanaşı fəaliyyət göstərməsi, işğaldan azad edilmiş ərazilərdə bərpa işlərinin məhz Ağdam Cümə məscidindən başlanması nümunə kimi göstərilir.
“Dini dəyərlərdən siyasi məqsədlərlə istifadə etmək, dini inancları cəmiyyətdə qarşıdurma vasitəsinə çevirmək isə nə İslamın mənəvi mahiyyətinə, nə də xalqımızın əsrlər boyu formalaşmış birgəyaşayış ənənələrinə uyğundur”, – deyə bəyanatda vurğulanır.
Geyim qaydaları hüquqi çərçivənin tələbidir
Forum bildirir ki, təhsil müəssisələrində hamı üçün müəyyən edilmiş qaydalara əməl olunması ümumi hüquqi çərçivənin tələbidir və bu qaydalar nə dini dəyərlərə qarşı yönəlib, nə də vətəndaşların məktəbdənkənar şəxsi həyatını tənzimləmək məqsədi daşıyır. Sənəddə Nazirlər Kabinetinin müvafiq qərarına istinad edilərək qeyd olunur ki, şagird geyim formalarına dair tələblərdə vahid formanı pozan və ümumi təhsilin dünyəvilik prinsipinə uyğun olmayan geyim elementlərindən istifadəyə yol verilmir. Təhsilverənlərin geyiminə dair tələblər isə müəllimlərin peşəkar görünüşünün və təhsil mühitinin dünyəvi xarakterinin qorunmasına xidmət edir.
Qurum geyim qaydalarının qanunvericiliyə uyğun, ardıcıl, şəffaf və hamı üçün bərabər şəkildə tətbiqini dəstəklədiyini açıqlayıb: “Məktəblər dini təbliğatın və ideoloji təsirlərin deyil, elmin, təhsilin, milli-mənəvi dəyərlərin və azad düşüncənin inkişaf etdiyi məkanlar olmalıdır”. Bəyanatda vətəndaş cəmiyyəti nümayəndələri, ziyalılar, müəllimlər, valideynlər və media dini həssaslıqlardan sui-istifadə edən informasiya kampaniyalarına qarşı prinsipial mövqe nümayiş etdirməyə çağırılır.
Deputatlar və ekspertlər mövzuya münasibət bildirdi
Həftə sonu bu mövzuda Milli Məclisin üzvləri də fikir səsləndirib. Deputat Elnarə Akimova APA-ya açıqlamasında bildirib ki, vahid məktəbli forması təhsil mühitində bərabərlik və məsuliyyət hissini gücləndirir. Onun sözlərinə görə, məktəb yalnız bilik məkanı deyil, uşaqların şəxsiyyət və vətəndaş kimi formalaşdığı, ortaq qaydalara hörməti mənimsədiyi yerdir: “Məktəb qapısından içəri daxil olan uşaq hər şeydən əvvəl şagirddir. Onun üzərində hər hansı simvolun daşınması bu neytrallığı poza bilər. Məktəb hamı üçün görünüşdə də, qaydalarda da, yanaşmada da eyni olmalıdır”.
Deputat Hikmət Babaoğlu isə “Azərbaycan müəllimi”nə müsahibəsində vahid formanın dünyanın əksər ölkələrində tətbiq olunduğunu, şagirdlərin diqqətini geyim fərqlərindən tədris prosesinə yönəltdiyini deyib. O, qaydalara etiraz edən valideynlərlə fərdi qaydada maarifləndirmə işi aparılmasını, hər bir etirazın səbəbinin ayrıca araşdırılmasını təklif edib.
QHT.az platformasının rəhbəri Cəsarət Hüseynzadə də vahid geyim formasının şagirdlər arasında sosial fərqlərin qabardılmasının qarşısını aldığını bildirib. O, təəssüflə qeyd edib ki, bu cür müzakirələr təhsilin inkişafına dair daha vacib məsələləri arxa plana keçirir.
Arxa plan
Məktəblərdə geyim qaydaları mövzusu ötən həftə Elm və Təhsil Nazirliyinin şagird və müəllimlərin geyim formasına dair monitorinqlər keçirəcəyini açıqlamasından sonra ictimai gündəmə çevrilib. Mövzu sosial şəbəkələrdə geniş müzakirə olunur; ötən günlər ərzində alimlər, hüquq müdafiəçiləri və ictimai xadimlər də “Azərbaycan müəllimi” qəzetinə açıqlamalarında dünyəvi təhsil mühitinin qorunmasının zəruriliyini vurğulayıblar.
Mənbə: muallim.edu.az, APA
Şərhlər