“Ritm Production” Kino Şirkətində istehsal olunmuş “Baş daşı” filmi İranda mükafat qazanıb. Şirkətinin direktoru Xaqani Həşimovun ANS PRESS-ə verdiyi məlumata görə, film Beynəlxalq 100 saniyəlik Filmlər Festivalında iştirak edib.

"Baş daşı" filmi ötən il “Ritm Production” Kino Şirkətinin fəaliyyətinin 5 illiyi münasibətilə keçirilən tələbə və gənclər arasında 5 dəqiqəlik film ssenariləri müsabiqəsində qalib olan 5 ssenaridən biridir. Müsabiqədə qalib olan ssenarilər şirkətin daxili imkanları hesabına ekranlaşdırılacaqdı.

Təqdim olunan ssenarilərdən yalnız biri, ADMİU–nun IV kurs tələbəsi Əliyev Royal Gündüz oğlunun ssenarisi bədii şura tərəfindən dəyərləndirilıb və keçən ilin sonunda istehsala buraxılmışdır. “Baş daşı” adlı filmə rejissorluğu elə Royal özü edib.

Film keçən ilin sonunda ACİ YF-in keçirdiyi müsabiqədə də mükafat qazanıb. Hazırda film daha iki festivala dəvətlidir.

Qeyd edək ki, “Ritm Production” olaraq gənclər və tələbələrlə çalışmalarımızı davam etdiririk. Hər zaman maraqlı ssenarilər gözləyirik. Məqsədimiz istedadlı gənclərə imkanlar açmaq, onlara çəkiliş meydançasında , studiyalarda işləmək şəraiti yaratmaqdır. Kinomuzun sürətli inkişafı üçün yeni nəsillər yetişməlidir. Bununçün də istər dövlət, istərsə də özəl kino şirkətləri, eyni zamanda yaradıcı və texniki peşəkarlar hər zaman gənc nəslə dəstək olmalıdırlar.