Almaniyanın qabaqcıl universitetlərindən biri olan Humboldt-Berlin Universitetində “Azərbaycan tarixi” kafedrası fəaliyyətə başlayıb. Azərbaycan Respublikasının Almaniyadakı səfirliyindən verilən məlumata görə, kafedra ötən aydan öz işinə başlayıb. Kafedranın açılmasına dair razılaşma isə ötən ilin dekabrın 3-də Humboldt-Berlin Universitetinin sabiq rektoru Xristof Markşies və Azərbaycan Respublikasının Almaniyadakı səfiri Pərviz Şahbazov arasında əldə olunub.

Bu ilin iyunun 8-də Humboldt-Berlin Universitetində fəaliyyətə başlayacaq “Azərbaycan tarixi” kafedrasının rəhbərliyinin seçilməsi məqsədi ilə həmin universitet tərəfindən yaradılmış komissiyanın yekun toplantısı keçirilib və kafedra müdiri vəzifəsinə Azərbaycan üzrə Almaniyada tanınmış mütəxəssis, ölkəmizin elmi mühitinə yaxşı bələd olan və elm-təhsil müəssisələri ilə sıx əməkdaşlıq edən professor Eva-Mariya Auxun namizədliyi dəstəklənib.

Kafedranın açılmasının əsas məqsədi Azərbaycan tarixinin tədqiqi, tədrisi, ölkəmizin tarixinə dair araşdırma və digər məsələlərdə Azərbaycanın müvafiq elmi qurumları ilə əməkdaşlıq, elmi tədbirlərin keçirilməsi, Azərbaycan tarixi ilə bağlı elmi-tədqiqat işlərinə, o cümlədən diplom işlərinə və dissertasiyalara elmi rəhbərlik, tələbələrin, elmi işçilərin və müəllimlərin qarşılıqlı mübadiləsi, Azərbaycanın müvafiq elmi-tədqiqat qurumları ilə birgə elmi tədqiqatların aparılması, elmi nəşrlərin həyata keçirilməsi, Azərbaycan tarixinə dair kitabxananın yaradılması və s. ibarətdir.

Bu münasibətlə Azərbaycan dövləti Humboldt-Berlin Universiteti ilə əməkdaşlıq çərçivəsində noyabrın 29-dan dekabrın 3-dək sözügedən universitetdə Azərbaycanın elm və mədəniyyət həftəsi keçirməyi planlaşdırır. Tədbirlər planına Azərbaycanla bağlı elmi fəaliyyət göstərən məşhur avropalı alimlərin toplaşdığı beynəlxalq elmi konfransın, gənclər forumunun, çoxsaylı mədəni tədbirlərin, konsertlərin və sərgilərin keçirilməsi daxildir.