Bu il tədris ilində Azərbaycanda ilk dəfə olaraq 320 minə yaxın məktəblinin vahid məktəbli formasına keçidi nəzərdə tutulub. Bunların içərisindən 33 minə yaxın I sinfə gedən uşaqlardır. Onların da hamısı məktəbə vahid məktəbli formasında getməlidir.

Bakı Baş Təhsil İdarəsinin ictimaiyyətlə əlaqələr sektorunun müdiri Zəminə Əliqızının ANS TV-yə verdiyi məlumata görə, məktəbli formasının alınmasında çətinliklə qarşılaşan valideynləri nəzər alaraq oktyabr ayının 1-nə qədər vahid məktəbli formasının alınma vaxtı uzadılıb.

“Biz valideynlərin təşvişini nəzərə alıb, oktyabrın 1-nə qədər vaxtı uzatmışıq. Yetər ki, şagirdlər dərsə ağ köynək, qara ətək yubka və şalvarda gəlsinlər”.

Xatırladaq ki, ötən gün “Bakı Tikiş Evi” ASC-nin Bakıxanov qəsəbəsi M.Fətəliyev küçəsi 17-də yerləşən dükanında satıcılarla valideynlər arasında mübahisə sonda dava ilə nəticələnib. Hadisəyə polislər müdaxilə etməli olub. Hadisə şahidlərinin sözlərinə görə, insidentin baş verməsinə səbəb dükanda işləyən satıcıların valideynlərlə qeyri-etik davranması olub. Hadisə nəticəsində dükanın şüşələri qırılıb, xəsarət alanlar da olub.