Sentyabrın 12-də Tələbə Qəbulu üzrə Dövlət Komissiyasında (TQDK) “Abituriyent” jurnalının hazırladığı fənlər üzrə test tapşırıqları kitablarının təkmilləşdirilmiş variantlarının təqdimatı keçirilib.

Azərbaycanda qəbul imtahanları zamanı biliklərin qiymətləndirilməsi artıq 19 ildir test üsulu ilə həyata keçirilir. Biliyin yoxlanılması və qiymətləndirilməsi sisteminin özəyini test tapşırıqları təşkil etdiyindən onların hazırlanması, tərtibi metodikasının təkmilləşdirilməsi TQDK-nın daim diqqət mərkəzindədir.

Bu sahədə işlər ilbəil genişləndirilir, yeni-yeni layihələr həyata keçirilir. Belə layihələrdən biri də bütün fənlər üzrə və bütün siniflər üçün test toplularının hazırlanıb çap olunmasıdır. Bu gün təqdim olunan test kitabları da həmin silsiləyə aid vəsaitlərin daha da təkmilləşdirilmiş nümunələridir.

Vəsaitlər qüvvədə olan tədris proqramları və dərsliklər əsasında hazırlanmışdır və həm şagirdlər, həm də müəllimlər üçün böyük praktiki əhəmiyyət kəsb edəcəkdir. Şagirdlər testlərlə işləmək bacarıq və vərdişlərini, ümumiləşdirmə qabiliyyətlərini, məntiqi təfəkkürlərini inkişaf etdirəcək, onları yaradıcı axtarışlar, təhlillər, müqayisələr aparmağa sövq edəcək, təfəkkürlərinin çevikləşməsinə, hafizələrinin möhkəmlənməsinə səbəb olacaqdır. Müəllimlər isə vəsait vasitəsilə az vaxt ərzində daha çox şagirdin biliyini aşkara çıxarmaq, materialların şagirdlər tərəfindən necə mənimsənildiyini müəyyənləşdirmək imkanı qazanacaqlar.

Cari ildən ali təhsil müəssisələrinə qəbul imtahanlarında (riyaziyyat fənni üzrə) açıq tipli test tapşırıqlarından istifadə edən TQDK gələcəkdə bu tipli test tapşırıqlarından digər fənlər üzrə də tətbiq etməyə hazırlaşır. Odur ki, yeni nəşrlərə hər bir fənn üzrə açıq tipli test nümunələri də daxil edilmişdir. Vəsaitdə açıq formalı test tapşırıqlarının 3 tipi (hesablama, uyğunluğu müəyyən etmə və seçim) üzrə nümunələr, onların cavablandırılma qaydası təqdim olunub.

Test tapşırıqlarından istifadə edən kontingentin əksəriyyət hissəsinin uşaqlar və yeniyetmələr olduğu nəzərə alınmış və kitablar ekoloji cəhətdən təmiz materiallardan hazırlanmışdır. Üz qabığı metal təbəqəli laminasiya plyonkada, içərisi göz yormayan kağızdan olan bu kitablar nəfis tərtibatla çap edilmişdir. Yüksək texnologiya ilə çap olunan kitabların həcmi böyük olsa da, çəkisi çox yüngüldür. Eyni zamanda, rənglər və kağız elə seçilmişdir ki, istifadə zamanı səhhət üçün narahatlıq yaratmasın. Yeni test kitabları artıq satışa çıxarılmışdır. Bakı, Sumqayıt şəhərləri və Abşeron rayonu istisna olmaqla, digər regionlardan olan oxucular orijinal nəşrləri Abiturient.az saytında internet ödəmə etməklə, 30% güzəştlə ala bilər. Sifarişlər qəbul edildikdən dərhal sonra poçtla ünvanlara çatdırılacaq.