Naxçıvan Dövlət Universiteti (NDU) milli təhsil tariximizə daha bir şanlı səhifə yazıb. Belə ki, Beynəlxalq Sosial Əməkdaşlıq Korporasiyasının “XXI yüzilliyin liderləri” Beynəlxalq imic proqramının qərarına əsasən, elmin, təhsilin və yeni texnologiyaların tətbiqinin inkişafı sahəsindəki mühüm nəticələrə görə Naxçıvan Dövlət Universiteti “Minilliyin universiteti” adlı beynəlxalq mükafata layiq görülüb. Bu münasibətlə NDU-da keçirilən mərasimdə bu təhsil ocağının rektoru, akademik İsa Həbibbəyli beynəlxalq mükafatın diplom, sertifikatını, döş nişanını və tərəqqinin rəmzi olan simvolik hədiyyəni nümayiş etdirərək əldə olunan uğuru ölkəmizdə təhsil sisteminə göstərilən qayğının bəhrəsi kimi dəyərləndirib.  Rəhbərlik etdiyi təhsil ocağının dünya təhsil sisteminə inteqrasiyasından söz açan rektor bu prosesdə son NDU-nun müasir standartlara cavab verən texnologiyalar ilə təchizatının mühüm rolu olduğunu qeyd edib. Onun sözlərinə görə, artıq NDU  NATO, BMT, AŞ kimi nüfuzlu beynəlxalq təşkilatlarla birgə layihələrin hazırlanmasına və həyata keçirilməsinə cəlb edilib, Avropa Rektorlar Klubunun, bu günlərdə isə Asiya Universitetləri Assosiasiyasının üzvü seçilib. Universitetin əməkdaşlarından 4 nəfəri Nyu-York Elmlər Akademiyasının, 1 nəfəri BMT yanında Beynəlxalq İnformasiyalaşdırma Akademiyasının, 2 nəfəri Beynəlxalq Turizm Akademiyasının üzvlüyünə qəbul olunub.