Çingiz Mustafayev Fondu, ANS Şirkətlər Qrupu və Gənclər üçün Təhsil Məkrəzi “Çingiz Mustafayevin 50 illiyinə” həsr olunmuş “Vətənpərvər kimdir?” adlı inşa müsabiqəsini elan edir. ANS PRESS-in məlumatına görə, müsabiqənin məqsədi məktəblilərin vətənpərvərliklə bağlı fikir və düşüncələrini öyrənmək, təhlil etmək və ictimaiyyətə çatdırmaqdan ibarətdir.

Müsabiqədə yalnız aşağıda adları qeyd olunan məcburi köçkün məktəblərinin 5-ci, 6-cı və 7-ci sinif şagirdləri iştirak edə bilər:

- Bakı şəhəri 286 saylı orta məktəbdə yerləşən 2 nömrəli Şuşa orta məktəbi
- Bakı şəhərində yerləşən 149 saylı Ağdam orta məktəbi
- Abşeron rayonunda yerləşən 117 saylı Kəlbəcər orta məktəbi
- Sumqayıt şəhərində yerləşən 5 saylı Cəbrayıl orta məktəbi
- Gəncə şəhərində yerləşən 5 saylı Kəlbəcər orta məktəbi
- Mingəçevir şəhərində yerləşən 52 saylı Ağdam orta məktəbi
- Füzuli rayonu Qayıdış qəsəbəsində yerləşən 4 nömrəli orta məktəb
- Füzuli rayonu 5 saylı Zobucuq qəsəbəsində yerləşən 52 nömrəli orta məktəb
- Beyləqan rayonunda yerləşən Xocavənd orta məktəbi
- Ağcabədi rayonu Alman qəsəbəsində yerləşən 1 saylı Xocavənd orta məktəbi

Müsabiqə üçün əsas tələblər:
- İnşalar yalnız müəyyən edilmiş 10 məcburi köçkün məktəbində təhsil alan 5-ci, 6-cı və 7-ci sinif şagirdləri tərəfindən hazırlanmalıdır;
- İnşalar məktəblilərin arzu etdiyi kağızda, əlyazma və ya çap formasında, aydın və səliqəli tərtib olunmuş qaydada, 2 səhifədən az olmamaq şərti ilə tərtib olunmalıdır;
- Müsabiqəyə təqdim olunan inşalar mövzu ilə əlaqədar müxtəlif ədəbiyyatlarda və qəzetlərdəki yazıları təkrar etməməlidir;
- İnşa müsabiqəsi üçün mövzular sərbəst seçilməlidir.

Müsabiqəyə təqdim olunan inşalar Azərbaycan dilində təqdim olmalıdır. Müsabiqənin nəticəsində hər sinif üzrə 1-ci yerləri tutmuş şagirdlərə video kamera, 2-ci yerlərə fotoaparat və 3-cü yeri tutmuş şagirdlərə qol saatı hədiyyə veriləcək. Bundan əlavə hər sinif üzrə həvəsləndirici 7 nominanta da diplom və hədiyyələr təqdim olunacaq.

Mükafatlandırma mərasimi 26 noyabr 2010-cu ildə ANS Media və Yayım Şirkətində keçiriləcək.
Regionlardan olan qaliblərin Bakı şəhərinə gəliş və gediş, eləcə də qalmaq xərcləri təmin ediləcək.

Müsabiqəyə inşaların təqdim olunması üçün son tarix 01 noyabr 2010-cu il, saat 17:00-dur.
İnşalar Gənclər üçün Təhsil Mərkəzinin aşağıdakı poçt ünvanına göndərilməlidir.

Ünvan: Bakı şəhəri, AZ 1141, Şəfayət Mehdiyev küçəsi 93, 9-cu mərtəbə (Torpaq Komitəsinin yanı).
Telefon və ya faks: (012) 434 22 03
Mobil: (055) 254 45 43
E-mail: [email protected]

 

ANSPRESS