Azərbaycanda müstəqillik qazanılandan sonra ilk dəfə olaraq orta məktəbi fərqlənmə ilə bitirən məzunlara medallar təqdim olunub. Qızıl medal alanların sayı 36, gümüş alanlar isə 16 nəfərdir.

Bakı Baş Təhsil İdarəsinin “Məzun 2011” adlı tədbirində paytaxtın 650-yə yaxın əlaçı məzunu iştirak edib. Təhsildəki yüksək naliyyətlərinə görə, ilk dəfə qızıl və gümüş medala layiq görülən məzunlar da məhz burada mükafatlandırılıb.

Təhsil naziri Misir Mərdanovun sözlərinə görə, qaliblər Təhsil Nazirliyinin apardığı yoxlama və buraxılış imtahanlarının nəticələri ilə yanaşı Tələbə Qəbulu üzrə Dövlət Komissiyasının keçirdiyi sınaq imtahanlarının nəticələrində də yüksək qiymətlər alıb. Medallara layiq görülənlərdən 18 nəfər Bakı, 15 nəfər Təhsil Nazirliyinin tabeliyində olan məktəblərin, 6 nəfər özəl məktəblərin, 12 nəfər isə bölgə məktəblərinin məzunudur. ANSPRESS