Azərbaycan Yazıçılar Birliyindən (AYB) APA-ya verilən məlumata görə, tədbiri universitetin filologiya və jurnalistika kafedrasının müdiri, fəlsəfə elmləri doktoru, yazıçı-dramaturq Firuz Mustafa açıb. F. Mustafa E. Hüseynbəyli barədə məlumat verdikdən sonra tələbə-müəllim heyəti ilə yazıçı arasında dialoq olub. Tələbələr əsasən yazıçının «Tut ağacı boyunca», «Şah Abbas» romanları, «Gözünə gün düşür», «Qaracanın qara başı», «Məzar gəlini və s. hekayələri barədə çoxsaylı suallar veriblər və əsərlər barədə fikirlərini bildiriblər. Görüşdə iştirak edən şair Qulu Ağsəs, Narıngül, Sərvaz Hüseynoğlu və Akif Əhmədgil qonaq barədə fikirlərini bildirdikdən sonra öz şeirlərini oxuyublar.
Tədbirin sonunda Elçin Hüseynbəyli fərqlənən tələbələrə kitab hədiyyə edib.

AYB-dən bildirilib ki, Elçin Hüseynbəylinin 50 illik yubileyi ərəfəsində silsilə görüşlər davam etdiriləcək. Dekabrın 20-də Sumqayıtda, dekabrın 21-də isə AYB-də tədbirlərin keçirilməsi nəzərdə tutulur.