Tələbə Qəbulu üzrə Dövlət Komissiyasının 2011/2012-ci tədris ili üçün Azərbaycan Respublikası ali təhsil müəssisələrinə II ixtisas qrupu üzrə iyulun 22-də keçirdiyi qəbul imtahanının nəticələri açıqlanıb. Komissiyanın mətbuat xidmətindən ANS PRESS-ə verilən məlumata görə, imtahan nəticələri bu gün TQDK-nın internet saytında (tqdk.gov.az) yerləşdirilib.

İmtahan nəticələri barədə məlumatı həmçinin “Azercell” və “Bakcell” nömrələrindən mobil telefonla "İmtahancell" xidməti vasitəsilə öyrənmək olar. Bunun üçün abituriyentlərin iş nömrələrini 7727 nömrəsinə göndərmələri kifayətdir.

Hər bir abituriyent öz imtahan nəticələrinə dair məlumat vərəqini internet vasitəsilə əldə edə bilər.

Qeyd edək ki, II ixtisas qrupu üzrə imtahanda iştirak etmək üçün sənəd vermiş abituriyentlərdən 620 nəfəri imtahanda iştirak etməyib. İmtahanda iştirak edən abituriyentlərdən 62 nəfəri qaydalara zidd hərəkətlərə yol verdiklərinə görə imtahandan xaric olunub və nəticələri ləğv edilib. Test imtahanının nəticəsinə əsasən 9643 abituriyent müsabiqədə iştirak etmək hüququ qazanıb.

II ixtisas qrupu üzrə test imtahanının nəticəsi əsasında imtahan ballarının paylanması "Abituriyent" jurnalının xüsusi buraxılışında dərc olunub. ANSPRESS