Şəkidə yanğın hadisəsi baş verib. ANS PRESS-in Kanal S-ə istinadən verdiyi məlumata görə, yanğın Şəkinin Qəzənfər Musabəyov küçəsindəki evlərdən birində meydana gəlib. Yanğın hadisəsi Elsevər Kərimova məxsus 130 kvadrat metr sahəsi olan kürsülü evin çardaq hissəsində qeydə alınıb.

Yanğın bir neçə dəqiqə ərzində evin bütün çardaq hissəsini və bir otağını öz cənginə alıb. Evin damı tamamilə yanaraq külə dönüb. Alovlar, həmçinin evin otaqlarından birinin içərsinə də daxil olub. Nəticədə otaq içərdəki əşyalarla birlikdə yanaraq külə dönüb. Hadisə yerinə dərhal Şəki Yanğından Mühafizə hissəsinin 3 yanğın söndürən avtomobili və canlı qüvvəsi cəlb edilib. Bir saata qədər davam edən yanğının qarşısını uzun cəhdlərdən sonra almaq mümkün olub.

Yanğının hansı səbəbdən baş verməsi hələlik bilinmir. Məlumatlara görə yanğın zamanı ev sahibləri evlərində olmayıblar. Yanğınsöndürənlərin səyi nəticəsində alovun digər otaqlara və qonşudakı evə keçməsinin qarşısı alınıb. Hazırda faktla bağlı Fövqəladə Hallar Nazirliyinin Şəki Yanğından Mühafizə Hissəsi tərəfindən araşdırmalara başladılıb. Hadisənin səbəbləri aparılacaq araşdırmalardan sonra bəlli olacaq.