Salyan rayonunun Arbatan kəndində narkotik becərməklə məşğul olan şəxs ifşa olunub. ANS PRESS-in bölgə müxbirinin verdiyi məlumata görə, həmin kəndin sakini Vilayət Teyyub oğlu Qədirovun narkotik vasitələrin qanunsuz saxlanılması və əkib-becərilməsi barədə polis şöbəsinə məlumat daxil olub. Dərhal hərəkətə keçən polisin apardığı əməliyyat-axtarış tədbirləri nəticəsində Vilayət Qədirov şübhəli şəxs qismində saxlanılıb. Sonra hal şahidlərinin və saxlanılanın iştirakı ilə onun həyətyanı sahəsinə baxış keçirilib.

Baxış zamanı sahədən aqrotexniki qaydada becərilmiş külli miqdarda narkotik vasitə olan çətənə kolu aşkar edilib. Çətənə kolları kökündən çıxarılaraq kisələrə yığılıb. Bundan başqa, əməliyyat zamanı fərdi yaşayış evindən qurudulmuş və qurudulmamış marixuana da aşkar edilib. Vilayət Qədirov verdiyi ilkin ifadədə törətdiyi əməldən peşiman olduğunu deyib.

Faktla bağlı Salyan rayon polis şöbəsində Cinayət Məcəlləsinin 234.1 və 237.2.3 maddələri ilə cinayət işi başlanıb, araşdırma aparılır.