Göyçay rayonuna yağan güclü leysan yağışı həyatı iflic edib. ANS PRESS-in bölgə müxbirinin verdiyi məlumata görə, yağışlar nəticəsində 150 kəndin təsərrüfatına ciddi zərər dəyib.

Dağlardan gələn sel suları şəhərin qərb hissəsinə, Ərəbcəbirli, Kürdşaban və Şəhadət kəndlərinə ziyan vurub. Güclü sel səbəbindən 150-yə yaxın evin həyətyanı sahəsinə, mənzillərin zirzəmilərinə, kafe və çayxanalara, sosial obyektlərin ərazisinə su dolub, küçələri lil qatı örtüb.

Sel suları həyətyanı sahələrin hasarlarını və yardımçı tikililəri uçurub, 100 hektardan çox əkin sahəsinə və taxıl sahəsinə ciddi ziyan vurub.

Yağan yağış nəticəsində Bığır kəndində 8 saylı elektrik paylayıcı şəbəkədə qəza yaranıb və 16 kəndində elektrik enerjisi kəsilib. Kənddə 5 ədəd elektrik dirəyi, iki ağac aşıb, naqillər qırılıb, Rayonda yaranmış problemlərin aradan qaldırılması üçün işlərə başlanılsa da, hələlik buna nail olmaq mümkün olmayıb.