Yevlax-Zaqatala-Gürcüstan magistiral yolunda baş verən ağır yol qəzasında iki nəfər ölüb, iki nəfər isə ağır bədən xəsarəti alıb. Bu barədə APA-nın Şəki-Zaqatala bürosuna Balakən rayon hüquq-mühafizə orqanlarından məlumat verilib.

Məlumata görə, iki nəfərin ölümü və iki nəfərin ağır xəsarət alması ilə nəticələnən ağır yol qəzasi Yevlax-Zaqatala-Gürcüstan magistiral yolunun 153-cü kilometrliyində, Balakən rayonunun Qullar kəndi ərazisindən keçən hissəsində qeydə alınıb.

Balakən rayonu Qullar kənd sakni, 1981-ci il təvəllüdlü Koltayev Həbib Əziz oğlu idarə etdiyi VAZ 21043 markalı, 36 BC 918 dövlət nişan nömrəli avtomobillə hərəkətdə olarkən, avtomobilin hərəkət istiqamətinin itirərək yolun kənarında dayanan “Zil” markalı, 85 BL 295 dövlət nişan nömrəli yük avtomobilinin arxasına vurub.

Qəza nəticəsində VAZ-21043 markalı avtomobildə olan sərnişinlər, 1988-ci il təvəllüdlü Balakən rayonu Qullar kənd sakini Məmmədov Rəşad Nəbi oğlu və həmkəndlisi, 1982-ci il təvəllüdlü Telliyev Sahib İsimxan oğlu aldıqları ağır bədən xəsarətlərindən hadisə yerində ölüblər.

Sürücü Həbib Koltayev və digər sərnişin, 1990-cı il təvəllüdlü, Balakən rayonu Qullar kənd sakini Doldalov Mohma Mansur oğlu aldıqları müxtəlif dərəcəli bədən xəsarətləri ilə Balakən Mərkəzi Rayon Xəstəxanasına (MRX) yerləşdiriliblər. Hazırda onların vəziyyətinin orta-ağır olduğu bildirilir.

Fakla bağlı DİN-nin Baş Dövlət Yol Polisi İdarəsinin istintaq və təhqiqat şöbəsində cinayət işi başlayıb, araşdırma aparılır.