Ermənistanın son diversiya əməliyyatı uzun illər ərzində bu ölkənin tutduğu qeyri-konstruktiv mövqenin bariz nümunəsidir. Ermənistan bu gün status-kvonu saxlamağa çalışır, bölgədə sülhə, sabitliyə və əmin-amanlığa xidmət edən addımlar atmaq əvəzinə, bölgədə daha çox hərbi ritorikanın güclənməsinə, qeyri-sabitliyə, müxtəlif provakasiyalara cəhd edir. Trend-in xəbərinə görə, bunu jurnalistlərə Prezident Administrasiyasının Siyasi təhlil və informasiya təminatı şöbəsinin müdiri Elnur Aslanov bildirib.

Elnur Aslanov deyib ki, uzun illərdir Ermənistan irrasional mövqe tutaraq danışıqlar prosesini uzadır, qeyri-adekvat mövqe tutur.

“Bu, onu göstərir ki, Ermənistan sülhün bərqərar olmasında maraqlı tərəf deyil”, - PA rəsmisi əlavə edib.

Elnur Aslanov deyib ki, ABŞ-ın dövlət katibi Hillari Klintonun Azərbaycan səfəri zamanı Dağlıq Qarabağ münaqişəsinin həlli əsas müzakirə mövzularından biri olacaq.