Zaqatala rayonunda ağır yol qəzası baş verib. Hadisə zaman 1 nəfər ölüb, 5 nəfər yaralanıb. Kanal S xəbər verir ki, yol qəza hadisəsi Zaqatala-Gürcüstan magistral yolunun 131-ci kilometrliyində, Zaqatala rayonunun Azərbaycan prospektində baş verib.

Şəhər istiqamətində hərəkət edən, 1992-ci il təvəllüdlü İbrahimov Fərid Fəxrəddin oğlu idarə etdiyi 62-BE-930 dövlət nömrə nişanlı "VAZ 2106" markalı maşınla piyada, 1977-ci il təvəllüdlü Osmanova Zümrüd Məhəmməd qızını vuraraq hadisə yerindən qaçmağa çalışıb.

Lakin hadisə yerindən qaçarkən idarəetməni itirən Fərid İbrahimov əks istiqamətdə hərəkət edən, 1987-ci il təvəllüdlüMustafayev Rövşən Akif oğlunun idarə etdiyi 62-BF-758 dövlət nömrə nişanlı "VAZ 2106" markalı avtomobillə toqquşub. Nəticədə Fərid İbrahimovun idarə etdiyi avtomobildə olan sərnişin, 1977-ci il təvəllüdlü Quliyev Orxan Zöhrab oğlu və digər avtomobildəki sərnişinlər - 1984-cü il təvəllüdlü Mustafayeva Xəyalə İnqilab qızı, 2006-cı il təvəllüdlü Mustafayeva Sevdayə Rövşən qızı müxtəlif dərəcəli bədən xəsarətləri ilə Zaqatala MRX-na çatdırılıblar.

Hadisəni törədən Fərid İbrahimov ambulator müayinədən sonra polis şöbəsinə aparılıb, ağır kəllə-beyin travması alan Xəyalə Mustafayeva isə həkimlərin səyinə baxmayaraq xəstəxanada dünyasını dəyişib. Digər 3 yaralının müalicəsi isə xəstəxanada davam etdirilir.

Faktla bağlı Zaqatala RPŞ-də cinayət işi açılıb, araşdırmalar aparılır.

Qəzanın dəqiq səbəbləri aparılacaq araşdırmalardan sonra bəlli olacaq.