Ötən gecə saatlarında Şəki rayonu ərazisində ağır yol qəzası baş verib. ANS PRESS-in bölgə müxbirinin verdiyi məlumata görə, Şəki-Qax yolunda, Şin körpüsü yaxınlığında Şəki şəhər sakini, 1939-cu il təvəllüdlü Abuzər Yaqub oğlu Allahverdiyevin idarə etdiyi “VAZ-2105” markalı, 10 FP 307 dövlət nömrə nişanlı avtomobil dərəyə aşıb.

Nəticədə A.Allahverdiyev, onun həyat yoldaşı, 1944-cü il təvəllüdlü Zürqələm Pirəli qızı Məmmədova, qızı, 1969-cu il təvəllüdlü Əminə Abuzər qızı Məmmədova və nəvəsi, 1999-cu il təvəllüdlü Mirvari Namiq qızı Məmmədova müxtəlif dərəcəli bədən xəsarətləri alıblar.

Yaralılar xəstəxanaya aparılıb. Xəstəxanadan verilən məlumata görə, Ə.Məmmədovanın vəziyyəti nisbətən ağırdı. Faktla bağlı araşdırma aparılır.