Bu gün saat 16:00 radələrində Bakıda, Sabunçu körpüsünün üstündə "KamAZ" markalı yük maşını yanıb. Sabunçu rayonu Polis İdarəsindən ANS PRESS-ə verilən məlumata görə, körpünün üstündə xarab olan yük maşını birdən alışmağa başlayıb. Əvvəlcə sürücü nasaz yük maşınını təmir etmək üçün yerə düşüb. Lakin mühərriki işlək vəziyyətdə olan yük maşını birdən öz-özünə alışıb.

Sürücü dərhal əraziyə Fövqəladə Hallar Nazirliyinin yanğından mühafizə xidmətinin əməkdaşlarını çağırıb. Yanğın tez zamanda söndürülüb. Müəyyən edilib ki, yanğının baş verməsinə maşının elektrik naqillərindəki qısaqapanma səbəb olub.

Hadisə baş verən zaman körpünün üstündə avtomobillərin hərəkəti çətinləşib və kiçik tıxac yaranıb. Yol polisinin müdaxiləsindən sonra problem aradan qaldırılıb.