Bakı-Şamaxı yolunda iki nəfərin ölümü, iki nəfərin xəsarəti ilə nəticələnən avtomobil qəzası baş verib. APA-nın məlumatına görə, hadisə yolun 97-ci kilometrliyində, Qobustan rayonu ərazisində qeydə alınıb.

Qobustan sakini, 30 yaşlı Yusifov Cahangir Ağalar oğlunun idarə etdiyi 10 NS 983 dövlət nömrə nişanlı, “VAZ 2106” markalı minik maşını yüksək sürətlə hərəkətdə olarkən qarşı tərəfdə eyni istiqamətdə hərəkətdə olan, evakuator xidməti göstərən maşına çırpılaraq aşıb.

Hadisə nəticəsində sərnişinlər – 21 yaşlı Baxışov Ağaheybət Ağalar oğlu və 32 yaşlı Qalibov Haqverdi Mayıl oğlu dünyasını dəyişib, sürücü Cahangir Yusifov və 36 yaşlı sərnişini Mustafayev Mustafa Arif oğlu isə müxtəlif dərəcəli bədən xəsarətləri ilə Qobustan Mərkəzi Rayon Xəstəxanasına yerləşdiriliblər.

Faktla bağlı Baş Dövlət Yol Polisi İdarəsinin istintaq və təhqiqat şöbəsi tərəfindən cinayət işi açılıb, araşdırma aparılır.