Qazıməmməd-Qazax magistral qaz kəmərindəki partlayışdan sonra baş vermiş güclü yanğın artıq söndürülüb. ANS PRESS-in bölgə müxbirinin verdiyi məlumata görə, yanğın təxminən saat 15:40 radələrində söndürülüb.

Hazırda hadisənin baş vermə səbəbləri dəqiqliyi ilə araşdırılır. İlkin ehtimallara görə, yanğının baş verməsinə borudakı qaz sızmaları səbəb olub. Ağdaş Magistral Qaz Kəməri sahəsinin rəis müavini Elşən Rəcəbovun ANS PRESS-in bölgə müxbirinə verdiyi məlumata görə, qəza nəticəsində ölkənin heç bir rayonunda “mavi yanacağ”ın verilişində məhdudiyyətlər yaranmayacaq.

"Həmin magistral xətdən əlavə paralel olaraq maye qaz boru xəttimiz var. Bunun sayəsində heç bir rayonda qaz verilişi dayandırılmayacaq. Qəzalı xətt isə sabah günorta saatlarına qədər təmir ediləcək", - deyə Elşən Rəcəbov bildirib.