Bu axşam saat 20:30 radələrində paytaxtda ağır yol qəzası baş verib. Hadisə Yasamal rayonu ərazisində, Tbilisi prospektində qeydə alınıb. Elvin Əliyevin idarə etdiyi “VAZ 2115” markalı avtomaşınla Əliyev Zakir Əsgər oğlunun idarə etdiyi “QAZ 3309” markalı qaldırıcı kran toqquşub. Qəza nəticəsində minik maşınının sürücüsü, bundan başqa avtomobildə olan iki sərnişin Əliyev Əsəd Arif oğlu və Şıxəliyev Fariz Nazim oğlu müxtəlif dərəcəli bədən xəsarətləri alaraq 1 saylı şəhər xəstəxanasına çatdırılıb.

Xəstəxanadan aldığımız məlumata görə, yaralılardan yalnız bir nəfər Fariz Şıxəliyevin vəziyyəti normal olduğundan ona ambulator müalicə təyin olunaraq evə buraxılıb.

Qeyd edək ki, yaralılar maşında sıxışıb qaldığından əraziyə Fövqəladə Hallar Nazirliyinin xilasediciləri cəlb edilib və onların köməkliyi ilə “VAZ 2115”-də olanlar çıxarılıb. Faktla bağlı Yasamal rayon Polis İdarəsinin istintaq şöbəsində araşdırmalara başlanılıb, avtotexniki ekspertiza təyin edilib. ANSPRESS