Bu gün səhər saatlarında vəfat etmiş Azərbaycanın xalq artisti, Akademik Milli Dram teatrının aktyoru, Prezident təqaüdçüsü, Şöhrət ordenli aktyor Yaşar Nuri ilə vida mərasimi keçirilir. ANS PRESS-in məlumatına görə, vida mərasimində iştirak edən unudulmaz aktyorun dostları onun haqqında fikirlərini bildiriblər. Əməkdar artist Zöhrə Abdullayeva ANS PRESS-ə açıqlamasında bu itkinin bütün mədəniyyətimiz üçün böyük zərbə olduğunu bildirib: "Biz Yaşar Nurini qoruya bilmədik".

Əməkdar artist Baloğlan Əşrəfov Yaşar Nuri Türkiyədə müalicə olunarkən ona bir neçə dəfə baş çəkdiyini və səhhəti ilə maraqlanığını bildirib. "O, Türkiyədə bir müddət mənimlə eyni xəstəxanada müalicə olunub. Bu cür aktyoru itirmək böyük itkidir", - deyə Baloğlan Əşrəfov bildirib.

Vida mərasimində olan müğənni Cavan Zeynallı da ANS PRESS-ə mərhum aktyor haqqında fikirlərini çatdırıb. "Yaşar Nuri mənim sevimli aktyorum idi. O, həm bir insan kimi həm də bir sənətkar kimi əvəzsiz idi. Onun vəfatı mədəniyyətimiz üçün ağır itkidir".

Xatırladaq ki, Azərbaycanın xalq artisti, Akademik Milli Dram teatrının aktyoru, Prezident təqaüdçüsü, Şöhrət ordenli aktyor Yaşar Nuri bu gün səhər saatlarında vəfat edib. Bu barədə mərhumun həyat yoldaşı xəbər verib. Azərbaycan kino və teatrında əvəzsiz rolların ifaçısı Yaşar Nuri uzun sürən xəstəlikdən sonra 61 yaşında dünyasını dəyişib.