Türkiyə millisinin və “Qalatasaray”ın keçmiş oyunçusu, millət vəkili Hakan Şükür Bakıya gəlir. Bu barədə məlumatı Hakan Şükür sosial şəbəkələrdə məlumat yayıb. O, “Facebook” və “Twitter” səhifələrində “Xeyirli sabahlar. Yolçuluq Azərbaycana” yazıb.

Xatırladaq ki, 2 gün əvvəl Hakan Şükür “azerisport.az” saytına verdiyi müsahibədə Azərbaycan səfərinin detalları barədə məlumat vermişdi.

“İki gün ərzində Bakıda olacağam və paytaxtınızda bir sıra vacib görüşlər həyata keçirəcəm. Məni Azərbaycana “Bakı”nın prezidenti Hafiz Məmmədov dəvət edib. Səfər zamanı “Atletiko”nun sizin futbolçularla oyununu da izləyəcəm. Mayın 1-də isə veteranlar arasında Heydər Əliyevin 90 illiyinə həsr olunmuş yoldaşlıq oyunu keçiriləcək. Həmin oyunda iştirak etməliyəm. Azərbaycana gəlişimdən çox şadam. Hamı ölkələrimizin nə qədər yaxın olduğunu bilir. Bizi çox şeylər birləşdirir”, – deyə Hakan Şükür bildirmişdi.