Dünyanın ən böyük kənd təsərrüfatı məhsulları ixracatçısı olan Amerika Birləşmiş Ştatları son 50 ilin ən quraq mövsümünü yaşayır. Quraqlığın başqa ölkələrə də təsirsiz ötüşməyəcəyi proqnozlaşdırılır. Belə ki, ABŞ-da quraqlıq dünya ölkələrində də qida məhsullarının qiymətini rekord həddədək artırır, dolayısı ilə qida böhranı bütün dünyaya təsir edir.

Dünyanın 1 nömrəli qarğıdalı, lobya və buğda ixracatçısı olan ABŞ-da quraqlıq artıq qarğıdalı və lobyanın qiymətinin rekord səviyyəyə qalxmasına səbəb olub. Qarğıdalının 1 kiloqramı ABŞ tarixində ilk dəfə 8 dollar həddini keçib. Analitiklər qarğıdalı qiymətinin 10 dollaradək bahalaşacağını proqnozlaşdırırlar. Bu isə digər qarğıdalı ixracatçılarının tələbatını artırıb. Belə ki, ildə 5 milyon ton qarğıdalı ixrac edən Çində bu il bu rəqəmin 8 milyon tona çatdırılacağı bildirilir. Yaponiya isə bu ilə planlaşdırdığı 15,5 milyon ton qarğıdalının miqdarını 16 milyon tona çatdıracaq.

ABŞ-da lobyanın qiyməti ilə bağlı vəziyyət də ürəkaçan deyil. Lobyanın qiyməti dünya tarixində rekord həddə - 17 dollar 11 sentə çatıb. Buğdanın qiyməti isə 50 faizdən çox artıb. Sürətlə artan qiymətin dünyanın 30 ölkəsində qida üsyanlarının baş verdiyi 2007-2008-ci illər qida böhranına bənzər bir böhranın baş verməsi təhlükəsini yaradıb.