Sabah Kanadanın Dartmut şəhərində yerləşən Banuk gölündə qadın və kişilər arasında kayak və kanoe qayıqlarında avarçəkmə üzrə dünya çempiona start veriləcək. “ANS PRESS”-in “amaf.az”a istinadən verdiyi xəbərə görə, 75 ölkənin nümayəndələrinin təmsil olunacağı yarışda ilk dəfə Azərbaycan avarçəkənləri təmsil olunacaqlar.

Kanoeçilərimiz Valentin Demyanenko və Sergey Bexuqlıy-Maksim Prokopenko dueti sabah keçiriləcək dünya çempionatında mübarizə aparacaqlar. Demyanenko 1 nəfərlik qayıqda 200 metr və 500 metr, Beuqlıy-Prokopenko dueti isə 2 nəfərlik qayıqda 500 metr və 1000 metr məsafərə yürüşlərə qatılacaq.

İdmançılarımız yarışa baş məşqçi Aleksandr Kalıbelnikov və məşqçi Valeri Kovbanovskinin rəhbərliyi altında hazırlaşıblar. 4 gün davam edəcək çempionatın ilk günündə 1000 metr və 500 metr məsafələrə seçmə mərhələ, ertəsi gün isə yarımfinal yürüşləri keçiriləcək.

Avqustun 15-də 200 metr məsafəyə isə final yürüşü baş tutacaq. Nəhayət yarışın son günü 200 metr və 500 metr məsafələrə final yürüşləri keçiriləcək. /ANS PRESS/