Ekologiya və Təbii Sərvətlər Nazirliyi meteohəssas insanlara xəbərdarlıq edir. Nazirliyin mətbuat xidmətindən Trend-ə verilən məlumata görə, aprelin 6-dan 8-dək Abşeron yarımadasında mülayim temperatur şəraiti meteohəssas insanlar üçün əlverişli olacaq. Amma aprelin 6 və 7-də atmosfer təzyiqinin xeyli enməsi fonunda gündüz arabir güclənən gilavar küləyi bəzi meteohəssas insanlarda diskomfort hissi yarada bilər.

Aprelin 6-da Bakıda və Abşeron yarımadasında hava dəyişkən buludlu, yağmursuz, səhər və axşam yarımadanın bəzi yerlərində duman olacaq. Mülayim cənub küləyi əsəcək, gündüz arabir güclənəcək. Havanın temperaturunun gecə 5-8, gündüz 16-21 dərəcə isti olacağı gözlənilir.

Azərbaycanın rayonlarında aprelin 6-da havanın əsasən yağmursuz keçəcəyi gözlənilir. Gecə və səhər bəzi yerlərdə duman olacaq. Cənub küləyi əsəcək. Havanın temperaturu gecə 4-8, gündüz 18-23, dağlarda gecə 1-6, gündüz 12-17 dərəcə isti olacaq.