Prezident zəlzələnin törətdiyi fəsadlarla tanış olub

Prezident İlham Əliyev Zaqatala və Qaxda zəlzələdən ziyan çəkən kəndlərə baş çəkib. Dövlət başçısı Qax rayonunun Güllük və Zaqatalanın Gözbarax kəndlərində zəlzələ nəticəsində evləri dağılmış sakinlərlə görüşüb, təbii fəlakətin törətdiyi fəsadlarla tanış olub. Prezident fəsadların aradan qaldırılması üçün lazımi tapşırıq və göstərişlərini verib.

Daha sonra prezident Zaqatala rayonunda baş vermiş zəlzələdən sonra yaradılmış Fövqəladə Hallar Nazirliyinin operativ qərargahına gəlib. Ölkə başçısının qərargahda müşavirə keçirəcəyi gözlənilir.

Qeyd edək ki, mayın 7-də səhər saat 09.40 radələrində Zaqatalada 7 bal gücündə zəlzələ qeydə alınıb. Daha sonra yeraltı təkanlar müxtəlif vaxtlarda təkrarlanıb. Son hesablamalara görə, zəlzələ nəticəsində rayonda 524 tikili uçub, 2052 tikili qəzalı vəziyyətə düşüb, 100 sosial obyektdə çatlar əmələ gəlib. Zəlzələnin törətdiyi fəsadları aradan qaldırmaq üçün ölkə başçısı ilham əliyevin tapşırığı ilə dövlət büdcəsindən fövqəladə hallar nazirliyinə 20 milyon manat vəsait ayrılıb.