Bakının müxtəlif yerlərində təmir işləri ilə əlaqədar bəzi yollar bağlanıb. Bakı şəhər Dövlət Yol Polisi İdarəsinin bölmə rəisi Vaqif Əsədov ANS PRESS-ə verdiyi məlumata görə, bu səbəbdən bəzi yollarda sıxlıq yaranıb. Yol polisi sürücülərin həmin istiqamətlərdən nisbətən az istifadə etməsini məsləhət görür.

Belə ki, Azadlıq prospektinin Mirqasımov küçəsi ilə kəsişməsindən Salatın Əsgərova küçəsinədək asfalt örtüyü çəkilir. Bu ərazidə yol bağlanmasa da, sıxlıq var. Zorge küçəsinin Nizami küçəsi ilə kəsişməsindən Üzeyir Hacıbəyov küçəsinədək olan hissəsində isə əsaslı asfaltlama işi görülür. Yol nəqliyyatın hərəkəti üçün bağlıdır. Bundan başqa, Sabunçu dairəsi – Zabrat - Maştağa yolunda da əsalı təmir işlərinə başlanıb. Bu yol boyunca kommunikasiya xətləri də yenilənir və nəticədə nəqliyyatın hərəkətində sıxlıq yaranıb.

Bundan başqa, Şərifzadə küçəsində də təmir işləri başlanılıb. Həmin küçənin “Günəş petrol” adlanan hissəsindən İctimai Televiziyanın binasınadək olan hissədə asfalt çəkilir, səki daşları yenilənir, hazırda isə xətləmə işləri həyata keçirilir. Həmçinin, Mikayıl Müşfiq dairəsinin Mətbuat prospekti ilə kəsişməsindən Badamdar qəsəbəsi istiqamətində, Qurd qapısı adlanan yerdən 3-cü kənar dairəvi yolu boyunca sağ və sol tərəfdə yeni hasarların qurulması, piyada zolaqlarının salınması, yolun enləndirilməsi işləri görülür.