Yevlax-Zaqatala-Gürcüstan magistral yolunda ağır yol qəzası baş verib, 3 nəfər ölüb, 5 nəfər isə ağır xəsarət alıb. Bu barədə Daxili İşlər Nazirliyinin (DİN) Baş Dövlət Yol Polisi İdarəsinin istintaq şöbəsindən məlumat verilib.

Qəza bu gün səhər saat 10.15 radələrində Yexlax-Zaqatala-Gürcüstan magistral yolunun 105-ci km-də, Zaqatala rayonu ərazisində qeydə alınıb. “VAZ 21099” markalı, 10 LR 090 dövlət nişan nömrəli avtomobillə “QAZ 31029 markalı, 10 UT 271 dövlət nişan nömrəli avtomobil qarşı-qarşıya toqquşub.

Nəticədə “VAZ 21099” markalı avtomobildə olan sərnişinlər - Zaqatala rayon Əliabad kənd sakini, 1980-ci il təvəllüdlü Haqverdiyev İsgəndər Haqverdi oğlu, Qax rayon Qaxingiloy kənd sakini, 1964-cü il təvəllüdlü Dmitri Epataşvili və Dmitri Epataşvilinin oğlu, 2003-cü il təvəllüdlü Qalaşvili Şota Dmitriyeviç hadisə yerində ölüblər.

“QAZ 31029” markalı avtomobilin sürücüsü, Qax rayonu Qaxingiloy kənd sakini, 1968-ci il təvəllüdlü Babacanaşvili Xivisa Artiloviç, sərnişinlər - Qaxingiloy kənd sakini, 1966-cı il təvəllüdlü Kolaçaşvili Nastan Andreyeviç, Gürcüstan Respublikasında anadan olan və hazırda Qaxingiloy kəndində yaşayan, 1975-ci il təvəllüdlü Kixaşvili Telava Krişna qızı və adı və soyadı hələlik istintaqa məlum olmayan Qax şəhərinin iki sakini müxtəlif dərəcəli ağır bədən xəsarətləri alıblar. Onlar Zaqatala Mərkəzi Rayon Xəstəxanasına yerləşdiriliblər.

Baş vermiş ağır yol qəzası ilə bağlı DİN-in Baş Dövlət Yol Polisi İdarəsinin istintaq şöbəsində cinayət işi başlayıb, araşdırma aparılır.