Zaqatalada avtomobil qaçıran şəxs yol qəzası törədib. Bu barədə APA-ya Zaqatala Rayon Polis Şöbəsindən məlumat verilib. Məlumatda bildirilir ki, bu gün saat 16 radələrində Yevlax-Zaqatala-Gürcüstan magistral yolunun Zaqatala rayonu Yuxarı Tala kəndi ərazisində ağır yol nəqliyyat hadisəsi baş verib. 1975-ci il təvəllüdlü Zaqatala şəhər sakini Əliyev Əli Elxan oğlunun idarə etdiyi VAZ-2106 markalı avtomobillə Zaqatala rayonu Əliabad kənd sakini Ramazanov Əhməd Mühüddin oğlunun idarə etdiyi “Qazel” markalı yük maşını toqquşub. Baş vermiş qəza nəticəsində müxtəlif dərəcəli bədən xəsarətləri alan VAZ-2106 markalı avtomaşının sürücüsü Əli Əliyevin həyatını xilas etmək mümkün olmayıb. O, Zaqatala Mərkəzi Rayon Xəstəxanasında (MRX) keçinib.

Zaqatala RPŞ-dən verilən digər məlumata görə, baş vermiş yol qəzası ilə bağlı Zaqatala rayon PŞ-nin əməkdaşlarının apardıqları ilkin araşdırma zamanı məlum olub ki, Əli Əliyev Zaqatala rayonu Keboloba kənd sakini Burayev Rəşidin idarə etdiyi VAZ-2106 markalı avtomobilə sərnişin qismində oturaraq maşını rayonun Yuxarı Tala kəndinə sürdürüb. Mənzil başına çatdıqdan sonra Əli Əliyev avtomobili sahibindən oğurlayaraq naməlum istiqamətdə hərəkət edib. Faktla bağlı Zaqatala RPŞ-də cinayət işi başlayıb, araşdırma aparılır.