Bu gün axşam saat 20:00 radələrində Bakının Yasamal rayon Polis İdarəsinin qarşısında ağır yol qəzası baş verib. Bir yoldan digər yola çıxan maşın daha iki avtomobili əzib. Nəticədə 3 nəfər ağır yaralanıb.

Yol müfəttişi Nicat Əliyev bildirib ki, ilkin versiyaya görə, Salamzadə küçəsi ilə hərəkətdə olan “Mercedes” markalı avtomaşın əks hərəkət zolağına keçib və “Tofaş” markalı avtomaşını vurub. O isə öz növbəsində “QAZ-31” markalı avtomobilə dəyib.

Toqquşmadan sonra “Mercedes” markalı avtomaşın əks hərəkət zolağına düşərək aşıb. Nəticədə hər üç avtomobilin sürücüsü müxtəlif dərəcəli xəsarətlər alıb. Onlar 1 saylı Şəhər Klinik Xəstəxanasına aparılıb. Qəza zamanı hər üç avtomobilə ciddi ziyan dəyib. “Tofaş” və “QAZ-31” markalı avtomobillərdən fərqli olaraq, “Mercedes” markalı maşının hadisə yerindən aparılması bir qədər vaxt aparıb.

Qəzanın baş vermə səbəbləri Yasamal rayon Polis İdarəsində araşdırılır. Araşdırmalardan sonra yol-nəqliyyat hadisəsinə hüquqi qiymət veriləcək.