Ötən gecə Bakı şəhəri Xəzər rayonu ərazisində yol-nəqliyyat qəzası qeydə alınıb. Mərdəkan istiqamətiylə hərəkət edən Qarayusifli Pərviz Fəxrəddin oğlunun idarə etdiyi “Daewoo” markalı avtomabil əks tərəfdən gələn Baxşıyev Rasim Rəfael oğlunun idarə etdiyi “Vaz 2107” ilə toqquşub. Nəticədə hər iki avtomabilin sürücüləri müxtəlif xəsarətlər alaraq xəstəxanalara çatdırılıblar. 3 saylı şəhər xəstəxanasına çatdırılan Rasim Baxşıyev dərhal reanimasiya otağına yerləşdirilib.

Digər avtomaşının sürücüsü isə 1 saylı şəhər xəstəxanasına yerləşdirilib. Onun vəziyyətinin nisbətən yaxşı olduğu bildirilir. Faktla bağlı Xəzər rayon polis idarəsində təhqiqat aparılır.

Daha bir qəza isə Nizami rayonunda qeydə alınıb. Rayon ərazisində Bəhruz Nuriyev küçəsiylə hərəkət edən “Nissan Murano” avtomobil dayanacağına girərək 3 maşını əzib. Hadisə sürücünün idarəetməni itirməsi nəticəsində baş verib. “Nissan” əvvəl girişdəki avtomabilin yan hissəsini zədələdikdən sonra “Mercedes” markalı avtomaşına çırpılıb. Daha sonra “Mercedes” eyni markalı başqa bil maşına dəyib. Hadisədən sonra “Nissan”ın sürücüsü hadisə yerindən qaçıb. Faktla əlaqədar araşdırma aparılır.