Azərbaycanın Xaçmaz rayonunda avtomobil yoldan çıxaraq su kanalına aşıb. Rayon polis şöbəsindən ANS PRESS-in bölgə müxdirinə verilən məlumata görə, hadisə dünən axşam saatlarında Xaçmazın Arzukənd kəndi ərazisində qeydə alınıb.

Qubanın Hacıqayıt kənd sakini Qabil Beykəz oğlu Feyzullayev bacısı oğlu 26 yaşlı Ayaz Cəmaləddin oğlu Abdullayevə məxsus avtomobili idarə edərkən qəfildən qarşısına iki qız çıxıb. Arxadan da “KamAz” markalı yük maşını gəldiyindən sürücü avtomobili saxlaya bilməyib. O, qızları vurmamaq üçün sükanı döndərib və nəticədə maşın yol kənarındakı su kanalına düşərək batıb.

Dayı və bacısı oğlunun köməyinə yaxınlıqda olan Saleh Babayev adlı şəxs çatıb. O, soyunaraq kanala atılıb və Qabillə birlikdə Ayazın sudan çıxarılmasına kömək edib. Xoşbəxtlikdən onlara heç nə olmayıb. Güclü su axını isə maşını xeyli aralıya sürüyüb. Maşın yalnız bu gün kanaldan çıxarıla bilib.

Hazırda Xaçmaz rayon polis şöbəsində hadisənin səbəbi dəqiqləşdirilir.