Bu gün səhər saatlarında paytaxtın Səbail rayonu ərazisində ağır yol qəzası baş verib. “Jiquli” markalı maşının traktora çırpılması nəticəsində bir nəfər ölüb, bir nəfər isə yaralanıb. Bu gün təxminən saat 11.00 radələrində Bakının Səbail rayonu Bibiheybət yolunda bir nəfərin ölümünə səbəb olan ağır yol-nəqliyyat hadisəsi baş verib. Qəza zamanı Zaur Əhmədovun idarə etdiyi “VAZ – 2107” markalı avtomaşınla Sədrəddin Əhmədzadənin idarə etdiyi traktor toqquşub.

Qeyd edək ki, hadisədən əvvəl hər iki nəqliyyat vasitəsi eyni istiqamətdə hərəkət edirmiş. Bu zaman “Jiquli”nin sürücüsü ara məsafəsini düzgün seçmədiyindən maşını gəldiyi sürətlə traktorun arxa hissəsinə çırpıb. Qəza zamanı “VAZ – 2107”də olan şəxsiyyəti hələ ki, məlum olmayan kişi sərnişin hadisə yerində dünyasını dəyişib.

Səbail rayon Dövlət Yol Polis Şöbəsinin baş inspektoru Asim Kərimovun sözlərinə görə, traktor düzünə hərəkətdə olan zaman dönüb şəhər istiqamətinə qayıtmaq istəyib: “Bu zaman da “VAZ-2107” markalı avtomaşın arxadan onun sol arxa hissəsinə çırpılıb”.

“Jiquli”nin sürücüsü Zaur Əhmədov isə hadisə şahidlərinin köməkliyi ilə 1 saylı Şəhər Xəstəxanasına çatdırılıb. Həkimlər onun vəziyyətini ağır kimi qiymətləndirir. Qəzadan sonra hadisə yerinə Səbail rayon Polis İdarəsi və Dövlət Yol Polis Şöbəsinin əməkdaşları cəlb edilib.

Faktla bağlı polis idarəsində cinayət işi başlanılıb. Qəzanın səbəbləri təyin ediləcək avtotexniki və tibbi ekspertizaların rəyindən sonra məlum olacaq.