Yevlax rayonunda faciəvi yol-qəza hadisəsi baş verib. Daxili İşlər Nazirliyinin mətbuat xidmətindən verilən məlumata görə, hadisə martın 10-da saat 16.00 radələrində Yevlax rayonunun Aran qəsəbəsi ərazisində qeydə alınıb.

Qəsəbə sakini Anar Mədətovun idarə etdiyi "UAZ" markalı və Cavid Cəfərovun idarə etdiyi "Toyota Land Cruzer" markalı avtomaşınlar toqquşub. Təkanın təsirindən sonradan "UAZ" markalı avtomaşın eyni istiqamətdə hərəkətdə olan Qazax rayon sakini Xaqani Çıxarovun idarə etdiyi "KRAZ" markalı avtomaşına çırpılıb.

Hadisə şahidlərinin ANS PRESS-ə verdiyi məlumata görə, "KRAZ"ın ön hissəsinə ilişən "UAZ" 20 metrə yaxın məsafədə sürüklənib. Nəticədə A.Mədətovun sərnişini, Aran qəsəbə sakini Yusif Mədətov hadisə yerində ölüb, xəsarət alan A.Mədətov və C.Cəfərovun sərnişini, Goranboy rayon sakini Aydın Zeynalov isə xəstəxanaya yerləşdirilib.

Faktla bağlı Nazirliyin Baş Dövlət Yol Polis İdarəsi tərəfindən araşdırma aparılır.