Bakının Nizami rayonu ərazisində avtomobildən külli miqdarda pul oğurlanıb. Oğurluq hadisəsi Naxçıvanski küçəsi, 10 ünvanında yerləşən binanın qarşısında, Qurbanov Oruc Səfər oğluna məxsus “Toyota Prado” markalı avtomaşından edilib.

Təxminən günorta saat 13:30 radələrində idarə etdiyi “Toyota” markalı avtomaşını yaşadığı binanın qarşısında saxlayan Oruc Qurbanov bir qədər sonra avtomobilinə yaxınlaşan zaman onun salonundan oğurluq edildiyinin şahidi olub. Bundan sonda o, dərhal Daxili İşlər Nazirliyinin 102 xidmətinə, eləcə də Nizami Rayon Polis İdarəsinin 24-cü polis bölməsinə məlumat verib.

Hadisə yerinə cəlb olunmuş polis əməkdaşları və ekspertlər avtomobilə baxış keçiriblər, onun üzərindən barmaq izləri götürülüb. Sürücü Oruc Qurbanovun bildirdiyinə görə, avtomaşının saxlanc yerindən təxminən 60 min manat pul aparılıb.

Faktla bağlı araşdırmalar aparılır və iş üzrə artıq cinayət işi başlanılıb. Nizami RPİ-dən ANS-ə verilən məlumata görə, cinayətdə hələlik şübhəli şəxs qismində saxlanılan yoxdur. Əməliyyat-axtarış tədbirləri davam etdirilir.