APA-nın Gürcüstan bürosunun məlumatına görə, hadisə saat 14.30-da Tiflis şəhərinin girəcəyində qeydə alınıb.
Gürcüstanın Bolnisi rayonunun Saraclı kənd sakini Binnət Xəlilov özünün idarə etdiyi JRJ 253 nişanlı “FORD” markalı maşını ilə hərəkətdə olarkən qəfildən idarəetməni itirib və nəqliyyat vasitəsi yolun kənarındakı sement dirəyinə çırpılıb. Hadisə yerinə təcili tibb yardımı maşını çağırılıb. Tibb bacıları və həkimin köməyi ilə xəsarət alan 56 yaşlı Binnət Xəlilova ilkin yardım göstərilib. Başından xəsarət alan zərərçəkən təcili yardım maşını ilə Tiflis şəhər xəstəxanalarından birinə çatdırılıb.
Binnət Xəlilov APA-ya açıqlamasında hadisənin necə baş verdiyini xatırlamadığını bildirib. Hadisə ilə bağlı araşdırma aparılır. Yol-patrul xidmətinin əməkdaşları sürücünün yol hərəkəti qaydalarına riayət etmədiyini və sürət həddini aşması nəticəsində yola nəzarəti itirdiyini bildirib.